Выправа литвы до Руских краин.

Текст написано старо-українською: руською мовою (Ђ=і)

Кернос, гды умер, тЂло его спалили ведлуг звичаю  поганского, a порох зобравши сховали  в труннЂ, под лЂсом, a по смерти его Живинбуд Девялтов, Вылкомир и Керно осЂл, по смерти тестя своего, a з Монтвилом, княжатем жмойтским, в приязни статечной жили на своих панствах перестаючи, руским княжатом на неприятеля помагали, волости мазовецкие наежджали, здобычи и полон выводили, и c того живилися.

A гды в Руси видЂли незгоду и на выбите з их моцы маючи погоду, часто наежджали на их панства и лупы брали, и до лЂсов густых як до замку утЂкали, и если  их  русь, гонячи, в полю не догнали, то уже в лЂсах и болотах гнати  их надаремно, гды жь  на островах и озерах, и в лЂсных яскинях ховалися, як в найлЂпших скринях.

A строи их — все звЂринные скуры, и маетность — на собЂ що могл носити; домы их были — кучка плетеная, дором простым  накрита, боты  их з лык, a звЂринный лоб обълупленый — вмЂсто шапки на голову клали, a гды в Руских землях достали c пълуга  лемешов, то на довгие киЂ, волочни наробивши, осадили и до стрЂл тежь желЂзец або шил набивали; o смерть мало дбали.

Перевозы тежь фортелныи мЂли: лоди и чолны з скур зубровых дивне зшиваных, a швы тые для воды, абы не протЂкала в чолны, натирали лоем, a гды где мЂли з войском тягнути, то и лоди тыи  з собою везли и тягли, и скоро на воды  глубокии приходили, в тых лодях возилися, a кони вплав вели. Так Живинбуд, пануючи в Лит†на Кернове, старался уставичне, абы внуки его могли заживати панованя отчистого литовского спокойне, и для того всЂ их справы простовал ко войнЂ, бо през добрую войну покой бывает.

Року 1256. Монтвил Гимбрудовичь, князь жмотский, зараз, скоро татаре руские панства бурити почали, начал  и он o собЂ промышляти, як бы могл з моцы руской выламатися и неволи, и c той дани лык и вЂников освободитися. Насылал козацкими дорогами з Живинбудом литву на плендроване краев руских, обачивши ку тому и зиму тугую для пребытя рЂк, озер и бродов. A гды Рускую землю и волости еЂ окрутне сплюндровали и з великими лупами до Литвы уходили, зобрался на них з новгорожаны князь Ярослав Всеволодовичь а, догонивши их, поразил литву над Двиною рЂкою, еднак же не без шкоды своих: там и князь Давыд топорецкий  от них зостал забитым. Потом знову, гды войско литовское князство Полоцкое воевало, зараз князь Давыдовичь Мстислав з рицерством смоленским, прудко на них притягнувши, под Полоцком их неосторожных и безпечных много их барзо побил, a инших во  озерЂ потопил.

Року 1258. Потом лЂпше ся той Монтвил поправил знаючи, же сторона Руская есть спустошеная, a княжата руские от Батия розгнаны, собравшися з Живинбудом Доспронговичем, жмонтским князем, a литвою своею, также c курляндов  албо корсов, над которым войском гетманом преложил сына своего старшого  Ердвила, або Радивила.

И  так Радивил ушиковал войско литовское, жмотское, корсовское порядне, поднесл тежь корогви военныи, а  трубачов  з долгими жмойтскими деревяными трубами, особно тежь обоз c колес скрипячих поставил на сторонЂ без зброи и панцеров (бо еще они того не знали), тылко зубровые, лосие, медвежии, вовчии невыправные  скуры носили, a оружие  — лук простый з дубины або лЂщины загненый, супороток, каменя торба на плечах певная для киданя з супоротка, рогатина, кий засмалованый  з конца, шабля ледво у гетмана была, мунштук з лык на коня, a на нем самом на войнЂ мЂсто лямпарта рогожа на плечах, лыка  и постронки за поясом для вязаня  неволника .

Гды юже пришли над Вилию рЂку, зараз з колод великих поробили плиты , на которых колеса и вси свои военныи риштунки поклавши, перевезлися и, сами в справных полках на рускую сторону перебывши, ушиковалися. Сам Ердвил з валным полком ишол позадЂ всего  обозу, a гетманов двух  на чоло з войском послал, a третьего гетмана послал з литвою в загоны.

A гды перешли  Немен, нашли в чтырох  милях гору красную вынеслую, на которой первей  был замок столечный Новъгородок  княжати руского, през Батия збуреный. Там зараз Радивил збудовал замок и осЂл без розляня крови (бо не было кому боронити), опановал великую часть Руской земли и почал писатися великим князем новгородским.

 


Потом далЂй тягнул Радивил и найшол  над Немном старое городище, замок от Батия збуреный, збудовал замок другий и назвал его Городком, a оттоля тягнул на Подляше, где в той час ятвяги  мешкали, найшол  там  Бересте, Хмелник, Дорогичин, Сурож, БЂлско, Бранско, мЂста и замки побуроные от Батия.

Тые всЂ замки знову побудовал Радивил, a русь, христиане, которые были по оном  несщасливом спустошеню Батиевом зостали, принял их ласкаве в свою оборону, a они ему на послушенство присягли . Так Радивил моц и пановане свое в руских князствах и замках предреченных  снадне  за короткий час розмножил и розширил, и писался таковым титулом: Радивил  Монтвиловичь Жомойтский  и Литовское земли дЂдичный пан, перший великий князь руский новгородский.

Добавить комментарий

Ваш адрес email не будет опубликован. Обязательные поля помечены *

*