О великом князи Кгиндимине

Текст написано старо-українською: руською мовою (Ђ=і)

И впокоивши землю Жомоитскую от немцов, и пошол на князи рускии, и приде напервеи к городу Володимеру. И князь Владимер володимерскии, собравшися c людми своими, и вчинит бои лют c князем великим Кгидимином. И поможе бог великому князю Кгидимину, иж князя Володимера володимерского убил и рать его всю побил, и город Володимер возмет. И потом поиде на князя Лва луцкого. И князь Лев услышал, што князя Володимера литва убила и город Володимер узяли, и он не смел противу его стати, и побежит до князя Рвоегана, до  зятя своего, к Брянску. A князи и бояре волынскии били челом великому князю Кгиндимину, абы в них пановал и господарем y них был, a земли их не казил. И князь великии Кгиндимин, укрекрепивши  их присягою и оставивши наместников своих y них там, и начне княжити.

A потом на зиму шол до Берестья и з Берестья вси воиска свои роспустил, a сам y Берестьи зимовал. И скоро Велик день минул, и он, собравши вси силы литовскии и жомоитскии, и рускии, и поиде на другои недели по Велице дни на князя Станислава киевского, и пришед возмет город Оуручеи и город Житомир. И князь Станислав киевскии, обославшися c князем Олгом переяславским и c князем Романом брянским, и c князем волынским, которого князь великии Кгиндимин выгнал з Луцка, и собралися вси y великом множестве людеи своих руских, и поткалися вси c князем великим  Кгиндимином на рецЂ на Рпени под Белым городом, y шести милях от Киева. И вчинили бои и сЂчу велику, и поможе бог великому князю Кгиндимину, и побет усих князеи руских наголову, и воиско их все побитое на месцу зостало, и князя Лва луцкого, князя Олга переяславского убил, и в мале дружине Станислав киевскии з Романом брянским утекут до Брянска, a князь великии  Скиндимин  остуиит Белгород. И горожане видечи, иж господарь их з воиска побег, a воиско все наголову поражоно, и они, не хотечи противитися воиску так великому литовскому.

И затым князь великии Кгиндимин пошол со всими силами своими до Киева и обляже город Киев, и кияне почалися ему боронити. И лежал князь великии Кгиндимин под Киевом месяц, a затым здумали межи собою горожане киевскии, иж моцы великого князя не могли терпети болши того без господаря своего, великого князя Станислава киевского. И вслышали то, иж Станислав утек от Кгиндимина и воиско господаря их побито, a в них нет зоставы никоторое, a князь их ни зоставил. И они, змовившися одномысленнЂ, поддалися великому князю Кгиндимину, и шедши з города со кресты игумены и попы и дьяконы, и ворота городовыи оттворили, и стретили великого князя Кгиндимина честно, и вдарили ему челом, и поддалися служити ему, и присягу свою великому князю Кгиндимину на том дали, и били челом великому князю Кгиндимину, штобы от них отчизны их не отнимал. И князь Кгиндимин при том зоставил и сам честно y город Киев уехал. И слышали то пригородки киевскии, Вышегород, Черкасы, Канев, Путимль, Слеповрод, што кияне передалися з городом, a господаря своего слышали, иж втек до Брянска, a силу его всю побиту, и вси пришли до великого князя Кгиндимина и c тыми вышереченными пригородки киевскими подалися служити, и присягу на том дали великому князю Кгиндимину.

И переяславляне слышали, иж Киев и пригородки киевскии подалися великому князю Кгиндимину, a господарь их князь Олг от великого князя Кгиндимина убит, и они, приехавши, и подалися з городом служити великому князю Кгиндимину, и присягу свою на том дали. И князь великии Кгиндимин, узявшы Киев и Переяславль и вси тыи вышеиречешши пригородки, и посадил на них князя Миндовгова сына Олкгимонта, великого князя Олшанского, a сам з великим веселием y Литву возвратися.

Добавить комментарий

Ваш адрес email не будет опубликован. Обязательные поля помечены *

*